1. 《蒙著嘴說愛你》姜濤
So I Say I Love You~ 相信大家都聽過呢句歌詞～喺疫情之下，世界各地嘅人都被口罩「蒙著了嘴」，唔單止日常生活受到唔同限制，有人更要同另一半分隔兩地，嘗盡相思之苦。2020年《蒙著嘴說愛你》推出嘅日子除咗疫情肆虐，亦都係姜B嘅21歲生日，所以姜B將生日願望寄予歌曲，就係希望疫情快啲完結，亦籍此歌同一眾姜糖攜手走過疫情，向大家宣揚正能量。
雖然被疫情阻隔，但唔好忘記多啲向心愛嘅人表達愛意，多啲說愛你喔！
2. 《無名指的光環》張敬軒
軒仔嘅《無名指的光環》內容係形容世上至死不渝嘅愛情。歌詞入面充滿住關於宇宙嘅元素，例如以土星嘅外環象徵住結婚戒指，套喺無名指上發光發亮。另外，歌詞入面用咗冥王星嚟比喻人生總會有走到盡頭嘅一日，但只要互相珍惜有對方嘅每一日，互相陪伴白頭到老，就唔需要為未來而害怕。
歌曲意思細膩，既感動又夢幻，非常推薦大家聽下啊！
3. 《難得一遇》林奕匡
阿Phil喺2017年1月推出咗《難得一遇》，同年3月就宣佈同拍拖九年嘅Rikko結束愛情長跑，正式成為夫妻。阿Phil被問到維繫感情嘅秘訣，佢話佢哋其實同好多情侶都一樣走過高山低谷，而Rikko更為阿Phil放棄幕前工作轉做文職，所以要好似歌詞所講咁唔會辜負彼此嘅相遇，會好好照顧老婆一生一世！
喺茫茫人海中都能夠搵到所愛係一種緣份，所以要好好珍惜對方啊！
4. 《霸氣情歌》陳柏宇
拍咗拖6年嘅Jason同Leanne喺2017年揀咗拍拖紀念日7月2號拉埋天窗，所以好友阿Phil同Wyman就包辦作曲同填詞，創作咗《霸氣情歌》送俾Jason做新婚賀禮。而為咗記錄結婚大好日子，《霸氣情歌》除咗有MV之外仲有「閃足一世足本記錄」版本，將結婚當日嘅精華片段share俾大家，真係甜到漏閃到爆啊！
記錄彼此甜蜜的點滴是為了將來可以回味，就像現在回顧起初交往走到結婚的時刻。
5. 《無名指的勇氣》林欣彤
相信大家喺疫情底下都過得唔容易，尤其係呢段時間準備結婚嘅新人，好多婚禮都未能如期舉行需要延期。阿Mag希望透過《無名指的勇氣》嚟歌頌新人克服重重難關嘅勇氣，同時鼓勵準備緊結婚嘅新人。阿Mag有坦言呢首歌好有挑戰性，因為歌曲入面表達緊結婚係人生大事，所以要用比平時更甜蜜嘅唱腔同聲線。佢好俾心機演繹呢首歌㗎，希望《無名指的勇氣》會成為大家嘅結婚進行曲。
與伴侶一同成長需要無比勇氣，攜手成雙迎接更好更幸福嘅將來。
6. 《囍宴樂隊》RubberBand
講到婚禮歌曲，不得不提嘅當然有RubberBand嘅《囍宴樂隊》啦～呢首歌以婚禮入面伴奏樂隊嘅角度出發，見證一對又一對新人喺宴會上恩愛嘅場面。雖然佢地見盡婚禮大小事，對婚禮非常熟悉，但其實心入面都憧憬住有一日自己喺婚禮入面唔再係囍宴樂隊，而係幸福美滿嘅男主角新郎。
在囍宴上，希望在座每一位能夠共同見證，為你和我送上誠摯祝賀。
7. 《好時辰》王菀之
《好時辰》除咗係一首好多新人都有共鳴嘅結婚歌曲之外，對Ivana自己都十分重要㗎。因為Ivana決定同Eric拉埋天窗時用咗《好時辰》嘅歌詞喺Facebook同大家宣布呢個好消息，而佢地嘅婚禮上都用咗呢首作品做婚禮歌曲，令佢地同一眾來賓都相當感動，所以呢首歌充滿住Ivana婚禮上段段美好嘅回憶啊～
從來沒有所謂最好的時間 只要你和我在一起已經最好的時間。
8. 《天梯》C AllStar
相信大家都聽過C AllStar嘅《天梯》，但大家又知唔知原來背後埋藏住一段可歌可泣嘅真實愛情故事呢？喺五十年代，一位青年愛上一位比佢大十歲嘅女士，但遺憾得唔到旁人嘅祝福。為咗避開旁人嘅流言蜚語，佢地決定私奔到深山生活。為咗可以方便妻子出入，丈夫花咗半世紀時間喺懸崖上面開鑿出一條6208級嘅「愛情天梯」。《天梯》正正將呢段故事寫入歌曲，歌頌呢段感人嘅愛情。
愛是無論要付出多少，都不會覺得累。
希望你們喜歡這次的婚禮歌曲推薦啊！❤️
